Tindero ng ukay patay sa saksak (Ina ng namamalimos sinermonan)

Patay ang isang tindero ng ukay-ukay matapos sawayin ang batang namamalimos sa kanya sa Paco, Maynila, kahapon.

Kinilala ang biktimang si Ramon Camotiao, 26, mula sa Imugan, Sta. Fe, Nueva Vizcaya, pansamantalang nanunuluyan sa pinagtatrabahuang RTW Surplus Center sa Casa Pension Compound, Pedro Gil St., corner Leon Guinto St., Paco, Maynila.

Sa imbestigasyon ng pulisya at pahayag ng mga testigo na sina Michael Petonio at Rodrigo Cruz, ala-una ng madaling araw nang makarinig ng ingay ang biktima sa gate ng kanyang pinagtatrabahuan kaya lumabas siya para tingnan at sawayin.

Nagulat si Camotiao na isang bata ang kumakalampag sa kanilang gate upang manghingi ng limang piso. Imbes big-yan ng limos ang bata, ibinaling ang kanyang pansin sa buntis na ina para pagalitan sa uma-no’y pagtuturo ng pamamalimos sa disoras ng gabi.

Narinig ng isang alyas Joker at dalawa pang kasamahan ang diskusyon ng ina at ng biktima kaya nakisali sa usapan ang mga lalaki na nagpainit ng ulo ng magkabilang panig.

Umalis si Joker kasama ang mag-ina at dalawang lalaking kaibigan habang nanatili ang biktima sa labas upang kumain ng balut. Matapos ang ilang sandali, bumalik ang suspek dala ang isang kutsilyo saka pinagsasaksak ang biktima sa kanyang likuran. Tumakbo palayo sa insidente ang suspek kasama ang dalawang kaibi-gan. Tinangka umanong habulin ni Camotiao ang mga sumaksak sa kanya ngunit bumulagta na siya sa kalsada.

(ROCELLE TANGI)