SBC puntirya ang top 2

SURE ball na ang defending champions San Beda College Red Lions sa Final Four subalit mahalaga pa rin ang natitirang laro dahil hinahabol nila ang top two sa pagtatapos ng eliminations round upang sakmalin ang twice-to-beat incentives.

Solo sa tuktok ang Red Lions sagpang ang 11-2 card habang nasa pangalawa ang Perpetual Help Altas na may 11-3 win-loss slate at 10-3 ang karta ng Letran Knights na nasa tersero puwesto ng team standings.

Ibibigay ang twice-to-beat advantage sa top two finishers kaya naman malaking bagay ang bawat panalo habang papalapit ang pagtatapos ng 89th season ng NCAA senior men’s basketball tournament.

Alas 6 ngayong gabi sa The Arena, San Juan ay paniguradong magiging mahigpit ang labanan ng Red Lions at Altas dahil sa kanilang puntirya.

Lumapa ng four-game winning streak ang San Beda habang kumadena ng tatlong panalo ang Altas.

Impresibo ang huling panalo ng Mendiola-based SBC laban sa College of Saint Benilde Blazers, 65-46 habang pahirapan ang huling tatlong panalo ng Perpetual.

Pinaluhod ng Perpetual ang Blazers, 68-64, sinunod ang Jose Rizal University Heavy Bombers, 64-61 at pagkatapos ay ang mahinang team na Mapua Cardinals ang kinaldag, 73-65.

Samantala, sa unang laro na mag-uumpisa ng 4 ng hapon maghaharap ang Pirates at Generals.

Manipis na ang tsansa ng LPU at EAC na sumampa sa semifinals subalit maaari pa silang magbakasakali dahil may limang laro pa silang nalalabi.

Tangan ng Generals ang pang-limang puwesto sa kartang 6-7 win-loss slate habang kasalo ng Lyceum ang Arellano University Chiefs sa eighth to ninth place hawak ang 4-9 card.

May 5-7 baraha ang JRU at 5-8 ang host CSB habang lubog sa ilalim ang Cardinals kalong ang 1-12 card. (ARABELA PRINCESS DAWA)