DPWH hugas-kamay sa usad-pagong na road construction

NAGSIMULA na naman ang pagbubungkal at pagsasaayos ng kalsada sa kahabaan ng Rizal Avenue Extension sa Caloocan City kaya simula na rin ng pagbagal ng daloy ng mga sasakyan at pagkairita ng mga driver at pasahero na dumadaan sa nasabing lugar. (RICROLDAN)

PINANINIWALAANG naghugas-kamay ang Department of Public Works and Highways  (DPWH) sa usad-pagong na road construction sa kahabaan ng Rizal Avenue, McArthur Highway, Malabon City, Monumento Circle EDSA, Samson Road, Caloocan City na dahilan ng trapik sa lugar.

Itinanggi ng ahensiya na mabagal ang isinasagawang road construction bunsod ng reklamo ng mga motorista na dumaraan sa lugar.

Sa panayam, tumangging magpaliwanag si DPWH NCR Director Reynaldo Tagudando, hinggil sa naturang proyekto dahil hindi niya kabisado ang proyekto.

Sa halip, si Engr. Allan Pajima ang kanyang pina-interbyu para sumagot sa mga katanungan sa proyekto ng DPWH sa area ng Caloocan at Malabon City.

Itinanggi ni Engr. Allan Pajima, Section chief Maintenance ng DPWH ang reklamo na mabagal ang road construction sa naturang lugar.

Hindi makapagpaliwanag si Pajima kung bakit  kailangan tumagal ang naturang proyekto na p’wede naman matapos sa maikling panahon.

Bagamat tiniyak ni Pajima na nakatakdang matapos sa Nobyembre at Disyembre 2013 ang proyekto, hindi niya matiyak kung kayang mapabilis ang road construction. (HNT)