Bong, pinagbabayad ni Osang sa utang sa GMA

NATAWA kami, si Senador Bong Revilla ang ipinasisingil ni Rossana Roces sa GMA 7, ng kanyang bayad sa network na itinakda ng korte. Dinugtungan pa niya iyon na kung siya lang “kahit singkong duling hindi ako magbabayad sa kanila”.

Nagpalabas na kasi ng desisyon ang korte na totoo ngang nagkaroon ng paglabag si Rossana sa kanyang kontrata sa GMA Network matapos niyang sabihin na ayaw na niyang mag-showbiz pero makalipas ang ilang buwan ay lumabas naman siya sa isa pang talk show sa ABS-CBN. Iyon ang batayan ng demanda ng GMA.

Ang sinasabi naman ni Rossana, nag-resign siya sa show nila matapos na ibulgar ni Lolit Solis na buntis ang kanyang anak na si Grace sa kabila ng kanyang denial. Natatandaan pa ba ninyo iyong kaso na inilabas pa ni Rossana ang supposed to be ay picture ng kanyang anak sa isang very private situation para patunayan lang na hindi iyon nabuntis ni Jolo Revilla? Pero nanganak pa rin naman ang anak niya at inaming si Jolo ang tatay.

Noon naman daw nag-resign siya, wala nang sinabi sa kanya ang GMA, at hindi naman siya tumatanggap ng anumang bayad mula sa network, kaya ang alam niya tapos na rin ang kanilang usapan. Iyon naman daw sinasabing paglabas niya sa The Buzz, interview daw iyon sa kanya dahil sa isang issue. Ibig sabihin hindi siya lumabas doon bilang talent ng show.

Bukod doon sinasabi niyang namatay daw ang kanyang abogado sa kasong iyon, at simula noon ay wala na siyang nalaman pa tungkol sa kaso hanggang sa lumabas na lang sa TV na pinagbabayad na nga siya ng P2-M sa GMA Network.

Pero talagang mas natawa kami roon sa sinabi niyang “singilin nila kay Bong Revilla”. Bakit si Bong ang magbabayad niyon?

(ED DE LEON)