Laglagan blues sa tongreso

HANAP-DAMAY. Ito ngayon ang mood ng mga mambabatas na nasasangkot sa PORK BARREL SCAM. Kumbaga sa isang taong may ginawang masama, kapag naipit na, ituturo na lahat. Kung malalaglag siya, isasama na ang mga kasama.

Ganito ngayon ang naoobserbahan ko sa Senado. Una, inilaglag na ni Juan Ponce “Happy ka sa PDAF” Enrile ang dating waswit, este chief of staff na si MA’AM GIGI REYES. At ngayon heto na si Sen. Jinggoy “Sexy” Estrada na nagsasabing magsasagawa siya ng PRIVILEGE SPEECH sa isang linggo para pangalanan ang iba pang kasamahan na umano’y may kinalaman din sa maanomalyang paggamit ng PRIORITY DEVELOPMENT ASSISTANCE FUND.

Pero teka, Sen. Denggoy, este Jinggoy. Hindi po ba mas magandang sagutin na muna ninyo ang lahat ng akusasyon at patunayang kayo po ay inosente sa ibinibintang sa inyo na kayo daw po ay NANDAMBONG ng daan-daang milyon pisong dapat sana ay nagamit sa pag-angat ng kabuhayan ng mahihirap na Pinoy? Mahirap din po, Mr. Sexy ang magturo dahil baka MANUNO at lalo pang magkaproblema.

Isa pa, kung ang magiging tugon ng sinoman na mambabatas sa kasong PLUNDER na isinampa sa kanila ay ang maghanap ng damay, hindi ba’t senyales ito na MAAARI ngang MAY KATOTOHANAN ang BINTANG? Parang sinasabi nating ABA HINDI LANG AKO. SILA RIN KASABWAT.

Well, karapatan ‘yan ng sinomang mambabatas na ipagtanggol ang sarili. Sabi nga, kahit gaano kalakas ang ebidensiya, kapag hindi pa napapatunayang GUILTY ay dapat ituring na INOSENTE pa rin.

Malay nga ba natin kung FORGED o PINEKE nga naman ng mga TRUSTED staff nila ang kanilang mga pirma. Ang makasasagot lamang niyan ay ang mga tauhan nila na sangkot din sa scam na ngayon ay mga nawawala na.

Takbo, mga hinayupak! Takbo! Balang araw madadampot din kayo at doon kayo kakanta na parang ibong Adarna. Sa tingin ko, lalong madidiin ang mga senaTONG at TONGresman natin kapag nagkantahan na ang mga ibong pipit.

Nasa taumbayan na ang huling halakhak!

Sa gagawing PAGHAHANAP-DAMAY ni Jinggoy, tila mas gugustuhin na niyang wasakin ang BAHAY kaysa linisin ito. Sama-sama tayo sa pagguho ng Kongreso.

Naku! Denggoy. Kayo na lang nina Tanda at Pogi ang magsama. Pero kung may ebidensiya din laban sa iba pa ninyong kasamahan, well and good!

Magsama-sama kayo sa bahay na napapalibutan ng rehas.

Joel M. Sy Egco