HATAW! D'yaryo ng Bayan hatawtabloid.com
Matapos makapagtala ng kahanga-hangang panalo sa bagong mananakbong kabayo na si Skyway sa isang “PCSO Maiden Race” ay muli na namang nagtagumpay ang kuwadra ni Ginoong Joey C. Dyhengco nitong nagdaang Linggo para naman sa kabayo niyang si Hot And Spicy nang masungkit ang tampok na pakarera na “JRA Cup” Japan Racing Association Cup.
Maganda ang diskarteng nagawa sa kanya ni jockey Dunoy Raquel Jr. na isinunod lang muna at hindi gaanong nakipag-sabayan sa ayre nung mga bumandera. Paglagpas sa poste ng medya milya o huling 800 na metro ay pinakawalan na ng husto ni Dunoy ang kanyang sakay at agaran naman nagresponde si kabayo, kaya pagsungaw nila sa rektahan ay kontodo unat at walang humpay na kamot naman ang nakita kay Hot And Spicy kahit pa naunahan na sila sa pagremate nung paboritong si Be Humble na dinala ni apprentice rider R.V. Leona.
Sa huling 150 na metro ay halos magkapanabayan na sina Be Humble at Hot And Spicy sa unahan, hanggang sa makarating sa meta na nauwi pa sa photo finish. Subalit sa bandang huli ay naideklarang lumagpas sa gawing labas si Hot And Spicy laban kay Be Humble.
Naorasan ang nasabing karera ng 1:43.0 (24.5-24.0-25.0-28.5) para 1,600 meters na distansiya.
Congrats muli sa koneksiyon ni Ginoong Joey C. Dyhengco at kay former jockey Dante Salazar na siyang namamahala sa kuwadra.
