HATAW! D'yaryo ng Bayan hatawtabloid.com
SASABAK sa mas malaking hamon si Maja Salvador sa kanyang ikalawang concert na pinamagatang Majasty. Gaganapin ito sa SM Mall of Asia Arena sa November 13. Nauna rito, noong July 12, 2014 ay ginanap ang unang concert ni Maja sa Music Museum, Greenhills, San Juan na pinamagatang MAJ: The Legal Performer.
Pero ngayon pa lang, sinabi ng Kapamilya star na hindi na raw niya pinapansin ang mga basher sa social media.
“Ay dedma ako d’yan. Super dedma ako. Talagang kunwari may mga negative silang sasa-bihin sa akin or kung ano man, expected mo na ‘yan, e. Kasi hindi nga lahat magugustuhan ka.
“Ano lang ‘yun, baligtarin mo lang. Gawin mo lang positive ‘yun. Kasi hindi ba kung ano ang ina-allow mo na mangyari sa ‘yo at iisipin mo, ‘yun ang mangyayari. So, doon ka lang mag-focus sa mga positive na sinasabi. Iyong negative wala, talo ka kapag inano (pinansin) mo ‘yun,” saad ni Maja sa isang panayam.
Bilang payo naman sa mga kapwa niya celebrity na madalas maputakti ng bashers, ito ang sinabi ni Maja.
“Kung pwedeng mas habaan na lang siguro ang pasensya. Pero ‘yun nga at the end of the day human lang kami, kung may nasasagot man ay mayroon pong pinanggalingan.”
Tama naman si Maja sa puntong ito, lalo’t may mga basher na sadyang nagpapansin lang at KSP lang talaga ang peg nila sa buhay!
Ayon pa kay Maya, excited raw siyang ipakita ang kabuuan ng concert niya.
“Siguro siyempre sayaw, expect ninyo na na sasayaw ako. Kapag kanta siyempre, no choice kayo kundi pakinggan ninyo rin ako kumanta kahit papaano. Siguro ‘yung mga kakaibang production numbers at set.
“Parang gusto ko naman i-share na ‘yung ako na dati parang nangangarap lang and now sino ang mag-aakala na MOA Arena.
“Basta gusto ko lang lahat ng manood doon, i-enjoy ‘yung night na ‘yun. And ‘yung parang kapag pumunta sila roon, isa sila sa dahilan kung bakit natupad ang pangarap ko,” saad pa ng aktres na napapanood sa TV series na Ang Probinsiyano ng ABS CBN.
ALAM MO NA! – Nonie V. Nicasio
