Jadine, tinalo na ang Kimxi at Lizquen (Sa lakas ng hiyawan at dami ng fans)

HALOS mabingi kami sa sobrang hiyawan ng sandamakmak na fans na nagtungo sa ANIMVERSARY ng It’s Showtime bilang pasasalamat at pagdiriwang sa anim na taon pagsuporta ng madlang people sa noontime show ng ABS-CBN.

Kakaibang hiyawan/sigawan ang aming nakita at narinig nang tawagin na ang mga nangunguna at maiinit na loveteam ng Kapamilya Network.

Dagdag pa rito ang kanya-kanyang gimmick ng fans na pinakamarami at organized ang KathNiel fans na may malaking letter streamer at kung ano-anong sign na nagpapakita ng pagsuporta sa kanilang hinahangaang loveteam. Ang loveteam din nina Kathryn Bernardo at Daniel Padilla rin ang may pinakamalakas na hiyawan.

Sumunod ang JaDine fans, nina James Reid at Nadine Lustre na talaga namang nakakikilig ang samahan. Ang napansin lang namin ay hindi na ganoon katindi ang hiyawan sa LizQuen loveteam (Liza Soberano at Enrique Gil) lalo na sa KimXi (Kim Chiu at Xian Lim) na ipinagtaka namin.

Kaunti lang kaya ang fans ng KimXi at LizQuen na nagtungo sa Araneta kaya hindi sila gaanong naramdaman?

Sa kabilang banda, kapansin-pansin ang sobrang sweetness ng KimXi nang mag-duet sila ng Mr Right na single ni Kim. Talagang parang may malalim nang nangyayari sa dalawa.

Nagpakilig din si Coco Martin nang awitin niya ang Panalangin kay Ms. Pastillas na halos maihi sa sobrang kakiligan.

Kahanga-hanga rin ang opening number ng mga host ng It’s Showtime na talagang buwis-buhay sa mga pasirko-sirkong ginawa nina Anne Curtis, Coleen Garcia, Karylle, at Vice Ganda. Hindi rin matatawaran ang ginawa nina Vhong Navarro at Billy Crawford na nagpaikot-ikot sa isang box.

Nakatutuwa rin ang mga ginawa ng iba pang host na sina Kuya Kim Atienza, Jhong Hilario, Jugs Jugueta, Teddy Corpuz, Ryan Bang, at Eruption.

Sa kabuuan, magandang naihatid ng It’s Showtime ang kanilang show and congrats sa bumubuo nito.

SHOWBIZ KONEK – Maricris Valdez Nicasio