2 patay, 1 sugatan sa taga at boga sa Lucena City

NAGA CITY – Patay ang dalawa habang isa ang sugatan sa nangyaring tagaan at pamamaril sa Purok Mutya, Brgy. Cotta, Lucena City kamakalawa.

Kinilala ang mga namatay na sina Norberto Custodio, 40, at Anaceto Aguda, 52, habang sugatan si Arthuro Custodio, 53-anyos.

Nabatid na pumunta sa nasabing lugar si Arthuro kasama ang kapatid na si Norberto para hanapin ang anak.

Naabutan ng dalawa ang suspek na si Aguda na umiinom, kung kaya naisipan ni Arthuro na tanungin kung nasaan ang kanyang anak.

Ngunit imbes na sumagot, biglang tumayo ang suspek at pinagtataga ang dalawa.

Agad nabunot ni Arthuro ang dala-dalang caliber .22 at pinagbabaril si Aguda sa iba’t ibang bahagi ng kanyang katawan.

Naisugod sa ospital ang tatlo ngunit dahil sa matinding tama sa katawan ay hindi na umabot nang buhay sina Norberto at Aguda.

Habang patuloy na nilalapatan ng lunas si Arthuro sa mga sugat sa balikat at noo.