Roxas inilampaso si Binay

NILAMPASAN ng personal na pambato ni Pangulong Noynoy Aquino na si Mar Roxas si Vice President Jejomar Binay sa pinakabagong survey na pinalakad ng Liberal Party.

Sinabi ni Caloocan Congressman Edgar “Egay” Erice na nagkomisyon ng isang survey ang LP para makita ang katayuan ni Roxas kung si Binay lamang ang kalaban sa pagkapangulo sa 2016.  

Lumabas sa survey na mula sa 1,200 respondents, 53 porsiyento ang boboto kay Roxas laban sa 37 porsyento lamang ni Binay. Nang tanungin kung bakit dalawa lamang ang pangalan na isinama sa nasabing survey, sinabi ni Erice na dalawa palang naman ang nagdeklara ng kanilang kandidatura.  

Nang tanungin si Erice ng kanyang opinion kung bakit naungusan na ni Roxas si Binay, sinabi niyang: “Lumalabas ngayon na mayroong significant influence ‘yung endorsement ni Pangulong Aquino.” 

Pinasinungalingan ng survey  ang  opinyon ng ilang political analyst na minaliit ang lakas ng endorsement ni PNoy at sinabing mahina raw ang kakayahan na impluwensiyahan ang mga mamamayan dahil pababa na sa puwesto. 

Hindi man niya inamin ang mismong pagganap sa survey dahil sa confidentiality agreement, nagpasalamat si Roxas sa taumbayan dahil sa patuloy nilang suporta. 

“Pasasalamat na lang kung totoo, tinatanggap ko ito hindi para sa akin,” sabi ni Roxas nang maabutan ng mga reporter sa pagpupulong ng Liga ng Mga Barangay Mindanao chapter. 

 Ipinagtanggol ng isa pang haligi ng LP na si Senate President Frankling Drilon ang survey at sinabing hindi ito maniobra lamang.