Estudyante ‘wag pilitin sa field trip — DepEd (Babala sa titsers)

BINALAAN ng Department of Education (DepEd) ang mga guro na huwag pilitin ang mga estudyante na sumama sa taunang “lakbay aral” o field trip.

Ayon kay DepEd Assistant Sec. Tonisito Umali, puwedeng tanggihan o hindi sumama ang isang estudyante at batay aniya sa kautusan ni Sec. Armin Luistro, maaaring hindi pasamahin ng mga magulang ang kanilang mga anak sa taunang lakbay aral na isinasagawa ng mga paaralan.

Dagdag ni Umali, dapat ay magpadala muna ng sulat ang isang kinatawan ng isang paaralan sa magulang ng mga bata na nagsasaad na papayagan nilang sumama sa field trip ang kanilang mga anak o hindi.

Aniya, hindi sapilitan ang field trip at dapat ay ginagawa ito na may kaugnayan sa asignatura ng mga mag-aaral.

Kung sakaling hindi makakasama ang isang bata sa lakbay aral ay maaaring bigyan ng substitute na assignment na may kinalaman din sa kasaysayan ng bansa.

Binalaan ni Umali ang mga paaralan na namimilit sa kanilang mga estudyante na sumama sa field trip, at hinimok ang mga magulang na magreklamo sa kanilang tanggapan. (ED MORENO)