Empleyado ng coal fired power plant utas sa 500 kgs crane hook

ILOILO CITY – Tiniyak ng Panay Energy Development Corporation (PEDC) ang pagbibigay ng tulong pinansyal sa pamilya ng kanilang trabahador na namatay makaraan mabagsakan ng hook ng crane.

Ang insidente ay nangyari sa site ng coal fired power plant sa Ingore, Lapaz kamakalawa.

Ang biktima ay kinilalang si Bernabe Molito, 56, tubong Limay, Bataan.

Tinatayang nasa 500-700 kilograms ang bumagsak na hook ng crane sa biktima na naging sanhi ng agaran niyang pagkamatay.

Kasunod ng aksidente, nire-review na ngayon ng kompanya ang kanilang ipinatutupad na safety measures sa coal plant at tiniyak na lalo pa nilang hihigpitan ang pagpapatupad nito para hindi na maulit ang kaparehong insidente.

Nakatakdang isailalim sa autopsy examination ang bangkay ng biktima bago dalhin sa kanilang lugar sa Bataan.