Mag-asawa iginapos holdaper arestado

ARESTADO ang isang 27-anyos padyak driver makaraan igapos at holdapin ang mag-asawang negosyante sa Tondo, Maynila kahapon.

Himas-rehas sa Manila Police District (MPD) Raxa Bago police station ang suspek na si Jardick Bardos, residente ng 17-C Andromeda St., Tondo, Maynila.

Habang nakatakas ang kasama ng suspek na si Jay-Ar Pedire, ng Sto. Niño St., Tondo.

Kinilala ang mga biktimang sina Ronald Simbling, 55, at Eveleny, 53, ng 88-D Herbosa St., Tondo.

Ayon kay Supt. Redentor C. Ulsano, ang hepe ng Manila Police District Station 1, dakong 4 a.m. nang holdapin at igapos ng dalawang suspek ang mag-asawa habang sila ay natutulog sa loob ng kanilang warehouse sa Brgy. 110, Zone 9, District 1, sa Tondo.

Ngunit makaraan ang insidente ay agad nagsumbong ang mag-asawa sa Don Bosco PCP na agad nagsagawa ng follow-up operation.

Nadakip si Bardos habang ibinebenta sa murang halaga ang  kahon-kahong used cooking oil na nagkakahalaga ng P100,000 ngunit nakapuga si Pedire.

Inamin ni Bardos na kaya nila hinoldap ang mag-asawa ay dahil sa malaking pagkakautang sa sindikato ng bawal na droga.

L. Basilio