Kandidatong swapang ‘wag iboto

NANAWAGAN si Pangulong Benigno Aquino III sa mga botante na ibasura ang mga kandidatong suwapang at walang pakialam sa bayan.

Sa kanyang talumpati makaraan inspeksyonin ang Angat Dam sa Norzagaray, Bulacan kahapon, nagbabala rin ang Pangulo laban sa mga kandidatong naglalako ng mga hungkag na pangako at magsasamantala lang sa puwesto.

Ang dapat aniyang piliing pinuno ay ang magpapatuloy ng “tuwid na daan” o kampanya laban sa korupsiyong isinusulong ng kanyang administrasyon.

“Piliin ninyo ang pinunong tototoo rin sa inyo. Hindi sino mang magbibitiw ng mga pahayag at pangakong walang laman; hindi sino mang may ni kaunting duda tayong magsasamantala o manlalamang; hindi sino mang may ambisyong parating pansarili, imbes na para sa buong bayan—kundi piliin natin ang indibidwal na panatag tayong ipagpapatuloy ang tuwid na daan,” pahayag ng Pangulo.

Nauna nang inihayag ng Pangulo na iaanunsiyo ang kanyang ieendosong presidential bet sa 2016 elections makaraan ang kanyang State of the Nation Address (SONA) sa Hulyo 27.

Rose Novenario