Basura ng Canada ‘di pwede sa Tarlac (Sabi ni Mayor)

MALINAW na may paglabag na ginawa ang presidente ng Metro Clark Waste Management Corp. (MCWMC) sa pagpayag na maitapon ang tambak-tambak na basura ng Canada sa Tarlac City.

Ayon kay Tarlac City Mayor Antonio C. Rodriguez Jr., may kasunduang pinirmahan ang MCWMC, kasama ang probinsiya ng Tarlac at ang Clark Development Corp. na pumapayag lang sa iilang lugar na makapagtapon ng basura sa landfill sa siyudad.

Kabilang dito ang mga basura galing Tarlac, Pampanga, Baguio at ilang lungsod sa Metro Manila.

“Kahit mga basura galing Visayas o Mindanao bawal din doon dahil iyon lang ang nakasaad (sa kasunduan),” paliwanag ni Rodriguez.

Malinaw rin, ayon sa alkalde, na may paglabag na ginawa si Rufo Colayco, presidente at chief officer ng ng MCWC sa nangyari at papatawan siya ng karampatang parusa, lalo at may nakalusot na higit 20 container van ng basura mulang Canada sa kanilang lugar.

Itinigil na muna ang pagtapon ng basura mula sa Canada, ayon kay Rodriguez, at inaalam na rin nila ang iba pang detalye kung paanong nakalusot sa siyudad ng Tarlac.