Supply ng bigas  sapat – NFA (Ngayong lean months)

TINIYAK ng National Food Authority na sapat ang supply ng bigas sa bansa ngayong lean months.

Inilahad ni NFA Administrator Renan Dalisay, nitong Hulyo nagsimula ang lean season na inaasahang magtatagal hanggang Setyembre.

Ngunit dahil sa epekto ng El Niño, maaari rin aniyang umabot ito hanggang Oktubre.

Aniya, “Nagsimula na ang El Niño pero maganda naman na umuulan-ulan, nakikita natin kaya nakapagtanim na rin ang ating mga magsasaka. Pero pinaghahandaan pa rin natin ito kasi sabi ng DoST-PAGASA, baka pagdating ng October, November ay mayroon pa ring El Niño, severe pa rin ang El Niño.”

Ipinaliwanag ni Dalisay, para hindi gumalaw ang presyo ng bigas sa merkado ay kailangan ng buffer stock na tatagal sa loob ng 30 araw.

Nakompleto aniya ito ng ahensiya makaraan mag-angkat ng 500 metriko tonelada ng bigas mula sa Vietnam at Thailand.