Babala ng Palasyo: Mag-ingat sa pekeng bigas

HINIMOK ng Malacañang ang publiko na maging maingat sa pagbili ng bigas at tangkilikin lamang ang mga tindahan na awtorisado ng National Food Authority (NFA) para hindi mabiktima ng pekeng bigas.

“Nananawagan po tayo sa mga mamamayan na maging maingat at bumili lamang ng bigas mula sa mga accredited at reliable na nagbebenta nito, ‘yun po talagang authorized rice dealers o mga tindahan ng bigas na mayroong pahintulot mula sa NFA (National Food Authority) at sa mga awtoridad,” ayon kay Communications Secretary Herminio Coloma Jr.

Nitong nakaraang Biyernes, inutusan na aniya ni Pangulong Benigno Aquino III sina Justice Secretary Leila de Lima at Interior and Local Government Secretary Mar Roxas na siyasatin kung saan nanggagaling ang fake o synthetic rice na napansin o natagpuan na sa ilang pamilihang bayan.

Maging si Presidential Assistant for Food Security and Agricultural Modernization Secretary Francis Pangi-linan ay sinisiyasat na rin ang bagay na ito, ani Coloma.

Nagsasagawa na ang Food Development Center ng NFA ng mga laboratory test ng mga sample na naisumite sa kanila at ipalalabas ang resulta nito sa lalong madaling panahon.

Ang pekeng bigas ay gawa sa pinaghalong kamote, bigas at synthetic polymer na kapag nakain ay mapanganib sa kalusugan.

Rose Novenario