10-anyos nalunod, 2 kapatid 1 pa ligtas sa tumaob na bangka

ZAMBOANGA CITY – Patay ang isang 10-anyos batang babae habang nakaligtas ang dalawa niyang kapatid at isa pang kalaro nang tumaob ang sinasakyan nilang rubber boat sa karagatang sakop ng Dipolog City kamakalawa.

Batay sa ulat mula sa Dipolog City police station, pumunta sa dalampasigan para maligo ang magkakapatid na sina Angelica Guaduario Ubando, 10; Andrea Guaduario Ubando, 9; Angela Guaduario Ubando, 8, at ang isa pa nilang kalaro na si Angelo Narit, 12.

Sumakay sa bangka na walang kasamang matatanda.

Sinabi ng mga nakaligtas na biktima, habang nakasakay sila sa naturang rubber boat ay bigla silang hinampas nang malakas na alon kaya tuluyang tumaob.

Nagawang maiahon ng tatlong biktima ang kani-kanilang sarili at sa tulong din ng ilang mga residente sa lugar ngunit nawawala ang biktimang si Angelica.

Nagsagawa ng search and recovery operation ang mga awtoridad sa lugar at makalipas ang ilang oras ay narekober ang bangkay ng bata.