Mag-ina todas sa bagsik ng kidlat

LA UNION – Sabay na namatay ang mag-ina makaraan tamaan ng kidlat sa Bauang ng nasabing lalawigan kamakalawa.

Sa salaysay ni Manuel Bancoyo ng Brgy. Urayong ng nasabing bayan, kasalukuyan silang naghahanda ng hapunan sa kanilang kusina dakong 5 p.m. nang bumuhos ang malakas na ulan kasabay nang malalakas na kulog at kidlat.

Tumama ang kidlat sa punongkahoy sa tabi ng kusina at kumalat sa bubungan hanggang sa tumama sa biktimang si Lolita Bancoyo, 54, at anak na si Marlyn Soriano, 26.

Sugatan ang mag-ina sa kanilang ulo at dibdib na parehong itinakbo sa pagamutan ngunit idineklarang dead on arrival.

Samantala, pumutok ang binti ng asawa ni Marlyn na si Marfer Soriano na tinaman din ng kidlat, ngunit masuwerteng nakaligtas.