Buntis napaanak sa ilang beses na hit & run mag-ina patay sa highway

LEGAZPI CITY – Parehong wala nang buhay nang madatnan ng mga awtoridad ang mag-inang biktima ng hit and run sa lalawigan ng Albay kamakalawa.

Kinilala ang ginang na si Gloria Gonzales, tinatayang nasa edad 34, mula sa Brgy. Kinuartilan, bayan ng Polangui.

Sa inisyal na imbestigasyon, naglalakad ang buntis na biktima sa bahagi ng Maharlika Highway Brgy. Ilaur Sur, ba-yan ng Oas nang masagasaan siya bandang 11 p.m.

Bagama’t narinig na ang malakas na tunog sa kalsada, ipinasawalang bahala lamang ito ng ilan sa mga residente sa lugar.

Bunsod nito, paulit-ulit na nadaanan ng mga sasakyan ang katawan ng biktima hanggang lumabas ang sanggol mula sa kanyang sinapupunan.

Lalaki ang kasarian ng sanggol na binawian din ng buhay.

Napag-alaman, nagkaroon ng problema sa pag-iisip ang biktima makaraan iwanan ng kanyang asawa, tatlong taon na ang nakararaan.