40 bahay, iskul sa Tondo nasunog

NATUPOK ang 40 bahay at bahagi ng Manuel L. Quezon Elementary School sa Tondo, Maynila nitong Linggo.

Ayon kay Fire Officer Edilberto Cruz, naapektohan ng sunog sa Perla Street ang 80 pamilya at 14 silid-aralan.

Nagsimula aniya ang sunog sa two-storey apartment ng isang Rodora Alonzo bandang 2 p.m.

Ang electrical overload ang itinuturong sanhi ng insidente.

Umabot sa Task Force Alpha ang sunog bago ito nakontrol pasado 4 p.m.

Tinatayang aabot sa P5 milyon ang halaga ng napinsala.

Isang Richard Muñoz ang nasugatan sa kanang binti bunsod ng insidente.

Bahagi ng UERM nilamon ng apoy

NASUNOG ang bahagi ng University of the East Ramon Magsaysay-Memorial Medical Center (UERM) sa Aurora Boulevard, Quezon City.

Dakong 3:30 a.m. nang sumiklab ang apoy na mabilis kumalat at umabot sa ika-apat na alarma dakong 4 a.m.

Batay sa paunang imbestigasyon, nasunog ang second floor ng gusali. Napag-alaman, sa computer room sa administration building nagsimula ang apoy.

Ayon kay Supt. Jesus Fernandez, posibleng nag-overheat ang aircon sa computer room na sinasabing halos magdamag nang nakabukas.

Patuloy ang imbestigasyon ng mga bombero sa sunog na naapula dakong 4:40 a.m.

Tinatayang nasa P150,000 ang halaga ng pinsalang idinulot ng sunog sa istruktura habang inaalam pa ang danyos sa mga kagamitan sa loob ng kwarto.

Walang naiulat na nasugatan sa insidente.