Bowles todo-ensayo para sa quarters

ni James Ty III

HANDA ang import ng Purefoods Star na si Denzel Bowles para sa aksyon sa best-of-three quarterfinals ng PBA Commissioner’s Cup mamaya kontra Alaska.

Katunayan, dagdag na ensayo ang ginawa ni Bowles sa kanyang mga tira sa labas at sa ilalim para paghandaan niya ang kanyang sarili sa match-up kontra sa import ng Aces na si Damion James.

Isang linggong pahinga ang Hotshots pagkatapos ng kanilang mga asignatura sa eliminations kung saan tumapos sila sa ikatlong puwesto at kinapos sila para sa twice-to-beat na bentahe sa quarterfinals.

Apat na sunod na panalo ang naitala ng Purefoods mula noong dumating si Bowles sa kalagitnaan ng torneo mula sa kanyang paglalaro sa Chinese Basketball Association.

Dinala ni Bowles ang Hotshots sa korona ng Commissioner’s Cup noong 2012 ngunit noong 2013 ay natalo sila sa semis ng torneo kontra Alaska kaya nais niyang gantihan ang nasabing pagkatalo ng kanyang koponan.