Bawal ang “spies” sa Wild Card Gym

ALERTO ang team Pacquiao sa katusuhan ng kampo ni Floyd Mayweather.

Isa sa solusyon ni Freddie Roach para hindi mapasukan ng mga pakawalang sparmates ng Team Floyd ay ang gawing “closed doors” ang gagawing sparring ng Pambansang Kamao sa Wild Card Gym.

Off limits kaninupaman ang Wild Card gym maliban sa direktamenteng involved sa sparring.

Ganoon kaingat si Freddie sa posibleng “spies” ni Floyd sa loob mismo ng Wild Card gym.

Ipinagbabawal din ni Roach ang anumang videos o camera na kukuha sa workout ni Pacman. Maiiwasan nga namang makunan ang anumang ginagawa nilang istratehiya sa ring.

oOo

Avid fan ni Floyd Mayweather Jr itong si Lou “Cinder” Block ng NOWBOXING.COM.

Masayado niyang minaliit ang kakayahan ni Pacquiao sa kanyang kolum nito lang March 18 nang sabihin niyang malalaman ng buong mundo sa May 2 na wala talagang karapatang si Pacquiao para hamunin si Floyd.

Sinabi pa nito na pinasikat lang ng media si Pacquiao kung bakit niya narating ang matinding kasikatan.

Ang isang matindi niyang batayan kung bakit dudurugin ni Floyd si Pacquiao ay nangyaring knockout na pagkatalo nito kay Marquez, na nilaro lang ng kanyang idolong si Floyd nang magharap sila.

Tinatawanan lang niya ang prediksiyon ni Freddie na mananalo si Pacquiao via knockout. Dahil sa laban sa May 2—tuturuan lang daw ng matinding leksiyon ni Floyd ang pinagmamalaki ng Pilipinas.

Hindi lang avid fan ito ni Floyd. Mukhang nasupalpalan ng pera sa mukha.

Palagay ko, hindi na ito magsusulat pa sa NowBoxing.com kapag natalo si Mayweather.

 

ni ALex L. Cruz