3 patay sa 2 amok na sundalo sa videoke bar

TACLOBAN CITY – Patay ang tatlo katao habang isa ang sugatan makaraan mag-amok ang dalawang sundalo sa isang videoke bar sa Brgy. Hiagsam, Jaro, Leyte kamakalawa.

Kinilala ang mga namatay na si Andres Cadapan, 60, retired employee ng Leyeco II, residente ng Tunga, Leyte; Joselito Cenico, residente ng Jaro, Leyte; at Lea Mae Jamito, waitress sa nasabing videoke bar, at residente ng Ipil, Ormoc City.

Habang nilalapatan ng lunas sa Eastern Visayas Regional Medical Center (EVRMC) ang isa pang biktima.

Kinilala ang suspek na si PFC Baltazar Nacion, miyembro ng 19th IB Bravo Company, at isa pang hindi nakilalang sundalo.

Ayon kay Senior Insp. Cesar Cojuanco Navarrete ng Jaro Police Station, sinita ng isang caretaker ng bar ang mga sundalo dahil sa sobrang ingay bunsod nang labis na kalasingan.

Nainsulto ang mga sundalo kaya pinaulanan ng bala ng mga suspek ang videoke bar.