‘Frat house’ hinalughog ng PNP, NBI

HINALUGHOG na ng mga pulis at ng mga ahente ng National Bureau of Investigation kahapon ang isang bahay sa Makati City na pinaniniwalaang doon naganap ang deadly hazing sa estudyante ng De La Salle University-College of St. Benilde na si Guillo Cesar Servando.

Pinasok ng mga tauhan ng Makati City police at Scene of the Crime Operations teams ang nasabing bahay sa Calatagan St., Brgy. Palanan para maghanap ng karagdagang mga ebidensya.

Kasama ng mga awtoridad si “Jomar,” ang sinasabing caretaker ng bahay, aminadong miyembro ng Tau Gamma Phi fraternity.

Kinordon na ng mga pulis ang bahay makaraan ituro ni Jomar na sumuko sa Manila police nitong Martes.

Si Servando ay binawian ng buhay bunsod ng matinding pinsala sa katawan dahil sa hazing, habang tatlo pa ang sugatan sa insidente. (HNT)