Muntinlupa Assessor’s employee itinumba
TINAMBANGAN ang isang kawani ng Muntinlupa City Hall ng dalawang hindi nakilalang lalaking lulan ng motorsiklo kahapon ng madaling araw.
Namatay noon din si Wilfredo Pastrana, 47, biyudo, draftsman sa Assessor’s Office, residente ng Lot 6, Block 28-J, Huli St., Katarungan Village, Brgy. Poblacion, Muntinlupa City.
Sa ulat na natanggap ni Sr. Supt. Allan Cruz Nobleza, hepe ng Muntinlupa City Police, dakong 12:30 a.m. nang maganap ang pamamaril sa panulukan ng Bruger St., National Road, Brgy. Putatan, Muntinlupa City.
Papatawid ang biktima galing sa isang restaurant nang sumulpot ang isang motorsiklong walang plaka at agad siyang pinaputukan nang dalawang beses. Pagkaraan ay mabilis na tumakas ang mga suspek.
Sinisilip ng Muntinlupa City police kung may kaugnayan sa trabaho ng biktima bilang draftsman sa Assessor’s Office ng lungsod ang pamamaslang.
(MANNY ALCALA/JAJA GARCIA)
