HATAW! D'yaryo ng Bayan hatawtabloid.com
HINDI na maaaring magamit ni dating Chief Justice Renato Corona at ng kanyang asawang si Cristina ang kanilang mga ari-arian makaraan patawan ng freeze order ng Sandiganbayan ang kanilang assets.
Sa kautusan ng Sandiganbayan Second Division, inaatasan ng korte si Sheriff Alex Valencia na agad ipatupad ang direktiba.
May kaugnayan ito sa forfeiture case ng mag-asawang Corona dahil sa sinasabing labag sa batas na pagkamal ng yaman.
Ang naturang usapin din at ang hindi pagdedeklara ng wastong SALN ang naging sanhi ng pagkaka-impeach kay Corona bilang punong mahistrado ng Korte Suprema.
DUMMIES DAMAY SA ORDER
DESMAYADO ang kampo ni dating Chief Justice Renato Corona sa inilabas na freeze order sa kanilang mga ari-arian ng Sandiganbayan.
Ang kautusan na may lagda ni Sandiganbayan Second Division Chairperson Justice Teresita Diaz-Baldos, ay may kaugnayan sa P130.9 million kwestyonableng ari-arian ng Corona couple.
Bukod sa mag-asawang Renato at Cristina, damay rin sa freeze order ang sinasabing naging dummy, trustees at iba pang taong mapatutunayang nagtatago ng mga ari-arian ng mag-asawa.
Epektibo ang kautusan ng Sandiganbayan makaraan maibigay ang kopya nito kay Sheriff Alex Valencia.
Nangangahulugan na sa bisa ng writ of preliminary attachment na inisyu ng korte, hindi magagalaw nina Corona ang kanilang mga ari-arian na sakop ng kautusan.
