Juliana masunuring anak 

HATAWAN
ni Ed de Leon

MAY nagsabi rin, nakatutuwa sina Mayor Richard Gomez at Cong. Lucy Torres Gomez dahil hindi nagkakaroon ng problema sa kanilang unica hija na si Juliana. Mukhang napaka-masunuring bata ni Juliana, at hindi gaya ng iba na ang akala ay kayang-kaya na nilang tumayo sa sarili nilang paa at humihiwalay na sa mga magulang.

Sabihin siguro nating dapat bigyan ng credit sina Goma at Lucy sa magandang pagpapalaki nila sa kanilang anak. Iyang mga anak naman, hindi niyan maiisipang mamuhay ng sarili kung nadarama nila ang pagmamahal at pangangalaga ng kanilang mga magulang. Kasi si Mayor Goma naman kahit na gaano siya ka-busy ay sinisiguro niyang may panahon siya para sa kanyang anak. Nakita naman ninyo na naimumulat niya si Juliana sa sports at mga sport iyon na nakahiligan din niya. Naging varsity si Juliana sa volleyball at ilang ulit nga bang nakasama sa National Volleyball Team si Goma. Naging champion fencer din si Juliana kagaya ni Goma, kaya makikita mo ang pagiging close ng dalawa. 

Iyong pagkilos ni Juliana at ang kanyang pananamit walang dudang nakuha naman niya kay Lucy.  At sabihin na rin nating dahil din iyan sa pangangalaga sa kanya ng kanyang lolo at lola. Buo kasi ang kanilang pamilya walang intriga sa kanilang pagsasamahan kaya maayos ang lahat.

Mapapansin ninyo magulo lang naman ang pamilya at may mga anak na humihiwalay sa magulang kung hindi maayos ang patakbo sa kanilang tahanan kung nagkakaroon ng hindi pagkakasundo sa ugali at sila-sila mismo ay may intriga sa isa’t isa. (Totoo ‘yan Kuya Ed nakausap ko na si Juliana, napaka-galang at mabait na bata—ED)

Hindi ba lagi namang ganoon ang ating nakikita?