HATAW! D'yaryo ng Bayan hatawtabloid.com
RATED R
ni Rommel Gonzales
NAKAPOKUS ngayon ang atensiyon ng publiko kina Eric Quizon at Ara Mina.
Sila kasi ang napili na maging pinuno at mentors ng NET25 Star Center para sa 32 baguhang artistang babae at lalaki na mga StarKada artists na susubukang pasikatin ng bongga ng NET25.
Ang Starkada ay maikukompara sa classic teen show na That’s Entertainment noong 1980 na hindi na mabilang ang mga sumikat tulad nina Judy Ann Santos, Ruffa Gutierrez, Lea Salonga, at Billy Crawford Kasama rin sina Lotlot de Leon, Isko Moreno at marami pang iba. At lahat sila ay ginabayan ng Master Showman na si German Moreno o Kuya Germs.
Katuwang nina Eric at Ara sina Wilma Galvante (Creative Consultant ng NET25) at Caesar Vallejos (NET25 President) sa pagpapakinang at paghubog sa mga bagong artista.
Base sa Starkada grand launch nila kamakailan sa EVM Convention Center sa gusali ng NET25 na nasilayan ang kanilang pagkanta at dancing skills, mukhang may ibubuga naman ang mga ito.
Bukod sa musical variety show, isasalang din ang mga bagets sa mga teleserye, short films at marami pang iba.
At sa guidance nina Ara (na incidentally ay naging member din ng That’s) at Eric ay mukhang isinilang na ang mga bagong breed ng big stars sa showbiz.
