HATAW! D'yaryo ng Bayan hatawtabloid.com
PINANINIWALAAN ng mga awtoridad na mas paboritong gamitin sa online scam ang SIM card ng Smart telecom kung pagbabasehan ang mga nakompiskang digital items sa raid sa isang POGO hub sa Pasay City kamakailan.
Kinompirma ni Presidential Anti-Organized Crime Commission head Usec. Gilbert Cruz, sa mahigit 20,000 pre-registered SIM cards, umaabot sa 15,683 ang Smart telecom.
Ang natitirang bilang ay pinaghati-hatian ng parehong local at international internet service providers, kabilang ang Globe telecom.
Ang POGO hub raid sa Pasay ay kabilang sa serye ng pagkilos ng awtoridad laban sa mga online scam, partikular sa mga lugar na nagkakanlong sa offshore gaming, o ang sugal na ang mga mananaya ay nasa labas ng bansa.
Pinaniniwalaan ng mga awtoridad na maraming ilegal at online crimes na nangyayari sa ilang POGO hub sa Kalakhang Maynila, tulad ng kidnapping, money laundering, at blackmail.
Ang mga nasabing cybercrimes ay nagaganap sa pamamagitan ng internet kaya masinsinang minamatyagan ng mga awtoridad ang galaw ng digital industry.
Ayon sa PAOCC, maaaring magtukoy
ang mga nakompiskang sim cards ng mga ilegal na gawain at pagkakakilanlan ng cyber criminals kaya maingat umano nilang binubusisi ang mga detalye sa loob ng Subscribers Identity Modules.
Sa kaugnay na balita, uumpisahan bukas (Martes), 5 Setyembre 5, bandang 10:30 am ang imbestigasyon ng Senado tungkol sa sinabing patuloy na pamamayagpag ng online scammers sa kabila ng ipinatupad na sim card registration.
Ang Senate inquiry ay gagawin ng committee on public services kasama ang committee on trade, commerce and entrepreneurship sa pangunguna ni Sen. Grace Poe.
Bubusisiin ng mga senador kung bakit sa kabila ng ipinatupad na sim card registration ay marami pa rin ang naiuulat na nangyayaring text scams at nagagamit ang Subscriber Identity Module o SIM sa ilegal na POGO operations.
Ipinatawag sa pagdinig ang mga opisyal ng National Telecommunications Commission, Department of Information and Communications Technology, law enforcers at telco executives.
