HATAW! D'yaryo ng Bayan hatawtabloid.com
Patay ang isang opisyal ng barangay matapos pagbabarilin ng nakamotorsiklong salarin sa lansangan ng Brgy. Bagbaguin, Sta.Maria, Bulacan kahapon ng umaga, Marso 29.
Sa ulat mula kay PLt.Colonel Christian B. Alucod, hepe ng Sta.Maria Municipal Police Station (MPS), ang biktima ay kinilalang si Aldrin Santos y Ativa, 38-anyos, brgy.kagawad at residente ng Poblacion 2 Justino Cruz Marilao, Bulacan.
Inilarawan naman ang salarin sa krimen na nakasuot ng puting helmet, puting jacket at itim na short pants na armado ng hindi pa malamang uri ng baril na tumakas sakay ng isang Honda TMX na kulay itim.
Ayon sa ulat, dakong alas-7:30 ng umaga kahapon, habang ang barangay kagawad ay nasa harap ng JPMS Driving School sa Brgy. Bagbaguin at nakikipag-usap sa kanyang tiyuhin nang ang suspek na armado ng pistola ay binaril ang biktima ng tatlong beses na tinamaan sa katawan.
Matapos isagawa ang krimen ay nagmamadaling tumakas ang salarin na sakay ng kanyang motorsiklo papunta sa direksiyon ng Brgy. Turo, Bocaue, Bulacan.
Samantalang ang biktima ay mabilis namang isinugod ng mga nagrespondeng mamamayan sa Bocaue Specialist Medical Center sa Bocaue, Bulacan subalit nasawi rin dahil sa malubhang tama ng bala na tinamo sa katawan.
Kasalukuyang nagsasagawa ng follow-up operation ang mga tauhan ng Sta.Maria MPS para sa posibleng pagkakakilanlan at pagkadakip ng suspek. (Micka Bautista)
