Vinluan kampeon sa Chess Tourney

NASIKWAT NI BRYLLE GEVER VINLUAN ng Baguio City ang kampeonato ng 1st Robinson’s Place Under-15 Chess Tournament nitong Setyembre 15 sa Calasiao, Pangasinan.

Bagama’t tangan ang disadvantageous black pieces, nakipaghatian ng puntos si Vinluan  kay Juan Carlos M. Presente ng San Jose Academy of Bulacan (SJAB) sa final round para pormal na maiuwi ang titulo sa 6-round tournament.

Nakakolekta si Vinluan ng total score  5.5 puntos, angat ng kalahating puntos kina 2nd placer Presente, 3rd placer John Marx Anastacio ng Pangasinan, 4th placer Paul Lejither Uy ng Tarlac City at 5th placer Jerome Junio ng Pangasinan na may tig 5.0 puntos.

Si Presente na ipinagmamalaki ng Novaliches Novelty Chess Club ay idineklarang over-all 2nd place matapos ang higher tie break points. Nitong Setyembre 4, tumapos si Presente ng over-all third place sa  1st CB Mall non-master 2000 below rapid chess tournament na ginanap sa Urdaneta, Pangasinan.

Nitong nakaraang buwan ay nakamit din ni Presente ang titulo at Board 1 Gold Medallist sa San Jose del Monte Private Schools Association (CSANPRISA) Chess Tournament High School.     (L. Icao)