Miyembro ng kilabot na criminal gang nasakote

ARESTADO ang isang hinihinalang miyembro ng kilabot na criminal gang na nakatala bilang isang high value individual ng Central Luzon sa isinagawang buybust operation sa Brgy. Sto. Niño, sa bayan ng Plaridel, lalawigan ng Bulacan, nitong Miyerkoles, 21 Setyembre.

Kinilala ni P/Col. Relly Arnedo, OIC ng Bulacan PPO, ang nadakip na suspek na si Ronaldo Montalbo alyas Bong, 48 anyos, residente ng Brgy. Poblacion, sa nabanggit na bayan.

Napag-alamang ang suspek ay miyembro ng notoryus na Contreras criminal gang, na sangkot sa pagnanakaw, carnapping at pagpapakalat ng ilegal na droga sa buong Bulacan at mga karatig-lalawigan.

Pinangunahan ng Bulacan Provincial Intelligence Unit (PIU) ang buybust operation katuwang ang PNP Drug Enforcement Group Special Operations Unit 3 at Plaridel MPS kung saan nadakip si Montalbo 5:30 ng hapon kamakalawa.

Nakumpiska mula sa suspek ang 18 pakete ng hinihinalang shabu na may timbang na 10 gramo at tinatayang nagkakahalaga ng P68,000; isang itim na keypad cellphone; bisikleta; at buybust money. (MICKA BAUTISTA)