8-anyos bata, nalunod sa ilog

PATAY ang isang 8-anyos batang lalaki matapos malunod sa ilog sa Navotas City, kamakalawa ng hapon.

Kinilala ni Navotas police chief Col. Dexter Ollaging ang biktima na si Kevin Hoybia, residente sa Bldg. 7, Rm. 27, Home 1, Tanza 2.

Lumabas sa imbestigasyon ni P/MSgt. Jayson Blanco, dakong 4:00 pm nitong ng Linggo nang maganap ang insidente sa Hulong Duhat Boundary at Batasan River, Tanza 2, makaraang tangayin ng mga alon ang biktima habang naliligo kasama ang kanyang 12-anyos na nakatatandang kapatid na lalaki.

Kaagad humingi ng tulong ang kuya ng biktima sa kanilang mga kaanak na agad namang hinagilap upang iligtas ang bata ngunit nabigo silang makita ito.

Ipinaalam ng ina ng biktima na si Perelyn, 48 anyos, ang insidente sa Barangay Tanza 2, na sila namang humingi ng tulong sa mga awtoridad.

Sa pinagsamang operations ng mga tauhan ng Bureau of Fire Protection (BFP), Coast Guard at Navotas NDRRMO, narekober sa naturang lugar ang walang buhay na katawan ng biktima dakong 12:30 pm nitong Lunes. (ROMMEL SALES)