Welder kulong sa baril

SWAK sa kulungan ang isang welder matapos makuhaan ng baril sa Valenzuela City, kamakalawa ng hapon.

Nahaharap sa kasong paglabag sa RA 10591 (Illegal Possession of Firearm and Amunation) ang naarestong suspek na kinilalang si Christopher Narin Gemina, 42 anyos, residente sa Building 15, Room 211, Disiplina Village T. Santiago St., Brgy. Lingunan.

Sa imbestigasyon nina P/SSgt. Regor Germedia at P/SSgt. Jeff Bautista, habang nagsasagawa ng casing surveillance si P/SMSgt. Roberto Santillan ng Valenzuela Police Station Intelligence Branch (SIB) sa Building 15, Disiplina Village T. Santiago St., Brgy. Lingunan, dakong 2:10 pm nang isang concerned citizen ang lumapit sa kanya at nagbigay ng impormasyon na may itinatagong baril ang suspek.

Nilapitan ni P/SMSgt. Santillan ang suspek na nakatayo sa ground floor ng naturang gusali at nagpakilalang pulis dahilan upang kusang isuko sa kanya ni Gemina ang isang revolver na may markang S&W 357 magnun, walang serial number at walang bala.

Nang hanapan ni P/SMSgt. Santillan ang suspek ng mga kaukulang dokumento hinggil sa naturang baril ay wala itong naipakita, dahilan upang siya ay arestohin. (ROMMEL SALES)