HATAW! D'yaryo ng Bayan hatawtabloid.com
IMBES sumuko matapos masukol sa pagtutulak ng ilegal na droga, mas pinili pang manlaban ng isang lalaki sa mga awtoridad na naging sanhi ng kanyang kamatayan sa lalawigan ng Bulacan nitong Miyerkoles, 19 Mayo.
Sa ulat mula kay P/Col. Lawrence Cajipe, provincial director ng Bulacan Police Provincial Office, nagsagawa ng magkasanib na operasyon ang Bulacan Provincial Intelligence Unit (PIU) na pinamumunuan ni P/Maj. Jansky Andrew Jaafar at Station Drug Enforcement Unit (SDEU) ng Plaridel Municipal Police Station (MPS) sa Brgy. Lumangbayan, sa bayan ng Plaridel dakong 1:00 am kahapon na nagresulta sa pagkamatay ng drug suspect na kinilala sa alyas na Alex.
Nabatid na kumagat sa pain na drug deal sina alyas Alex at isang kasamang tulak sa poseur buyer ngunit nakatunog ang mga suspek na pulis ang kanilang katransaksiyon kaya pumalag.
Pilit pa rin pinasusuko ng alagad ng batas ang mga suspek ngunit imbes sumuko ay bumunot ng baril si alyas Alex at nagpaputok kaya napilitan ang mga back-up security na gumanti.
Sa palitan ng putok, tinamaan si alyas Alex na nagresulta sa kanyang kamatayan habang ang kasama niyang tulak ay sinamantala ang pagkakataon at nagawang makatakas sakay ng isang asul na motorsiklo.
Samantala, nasakote ang 23 pang drug suspects sa mga serye ng ikinasang drug sting ng mga operatiba ng Station Drug Enforcement Units (SDEU) ng San Rafael, Norzagaray, Plaridel, Bustos, Bocaue, Sta. Maria, San Ildefonso, San Jose del Monte, at Marilao PNP hanggang kahapon.
Nakompiska sa mga supek ang 59 selyadong plastic sachets ng hinihinalang shabu, dalawang cut-opened sachets ng shabu; iba’t ibang drug paraphernalia; isang puting Toyota Vios, may plakang ECR 4564, at buy bust money. (MICKA BAUTISTA)
