HATAW! D'yaryo ng Bayan hatawtabloid.com
NALAGLAG sa kamay ng mga alagad ng batas ang dalawang lalaking pinoproblema ng mga residente dahil sa pagiging talamak na tulak sa kanilang lugar sa mga bayan ng Norzagaray at Angat, sa lalawigan ng Bulacan.
Sa ulat mula kay P/Col. Lawrence Cajipe, provincial director ng Bulacan PNP, nadakip ng mga operatiba ng Station Drug Enforcement Unit (SDEU) ng Norzagaray Municipal Police Station (MPS) ang suspek na kinilalang si Ejay Ramos ng Tabtab, Brgy. Poblacion, sa bayan ng Norzagaray.
Nasakote si Ramos, na sinasabing walang takot at halos lantaran kung magtulak ng shabu sa kanilang barangay, nang kumasa sa ipinaing buy bust operation ng mga tauhan ng Norzagaray MPS.
Samantala, nakorner ng mga operatiba ng Station Drug Enforcement Unit (SDEU) ng Angat Municipal Police Station (MPS) ang isa pang suspek na kinilalang si Anthony dela Cruz, isa rin notoryus na tulak sa kanilang lugar, sa Brgy. San Roque, sa bayan ng Angat.
Nabatid na matagal nang tinututukan ng mga awtoridad si Dela Cruz na isang notoryus na tulak sa Brgy. San Roque at mga kanugnog nitong barangay sa Angat.
Sa pinaigting na kampanya ng mga miyembro ng Angat MPS, nasukol din ang suspek sa kanyang pinaglulunggaan nang kumasa sa inilatag na buy bust operation.
Sa pagkakasakote sa dalawa, malaki ang pasasalamat ng mga residente sa pulisya ng Norzagaray MPS at Angat MPS dahil nawala ang kanilang pangamba na maging biktima ang kanilang mga anak ng ipinagbabawal na gamot.
Nasamsam ng pulisya sa operasyon ang limang selyadong plastic sachet ng hinihinalang shabu at buy bust money mula sa mga suspek na ngayon ay nahaharap sa kasong paglabag sa RA 9165 o Comprehensive Dangerous Drugs Act of 2002. (MICKA BAUTISTA)
