HATAW! D'yaryo ng Bayan hatawtabloid.com
BUGBOG-SARADO ang mukha ng isang lolong obrero makaraang gulpihin ng kanyang kasamahan sa construction site matapos mag-inuman sa Malabon City, kahapon madaling araw.
Ginamot sa Ospital ng Malabon (OsMa) ang biktimang kinilalang si Antonio Las Piñas, 61 anyos, residente sa Lot 2, Block 32 Gabriel Subdivision D2, Brgy. Hulong Duhat ng nasabing lungsod sanhi ng mga pasa at bukol sa mukha.
Kinilala ni P/Maj. Patrick Alvarado, hepe ng Station 7 Malabon Police, ang suspek na kasama sa bahay ng biktima na si Roland Guita, 35 anyos, nahuli ng mga barangay tanod na sina Nicanor Mission at Noel dela Cruz, na agad nagresponde nang mabatid ang pangyayari.
Batay sa ulat ni P/SSgt. Mardelio Osting, may hawak ng kaso, dakong 12:00 hatinggabi, nag-iinuman ang biktima at ang suspek sa loob ng kanilang tirahan sa nasabing lugar.
Ilang minuto pa ay naubos na ang kanilang iniinom nang bigla umanong hablutin ang nakahigang si Lolo Antonio sabay pinaulanan ng suntok sa mukha dahilan upang mapuno ng pasa.
Pinaghinalaan ng suspek na ang lolong obrero nagsisipsip sa kanilang kapatas.
(ROMMEL SALES)
