HATAW! D'yaryo ng Bayan hatawtabloid.com
ISINAALALIM sa lockdown ang Navotas City Hall matapos magpositibo ang 24 kawani sa CoVid-19, ayon sa City Epidemiology and Surveillance Unit.
Ayon kay Mayor Toby Tiangco, kabilang sa naka-lockdown ang Navotas City Hall Annex (kasama ang NavoServe) at Franchising Permits Processing Unit na nagsimula 23 Pebrero, 8:01 pm, hanggang sa Linggo, 28 Pebrero, 11:59 pm.
Ibig sabihin, wala munang transaksiyon sa city hall tulad ng application/renewal ng business permit at pagbabayad ng amilyar, maging ang pagkuha ng plaka ng mga tricycle at PUJ.
May mga papasok aniyang kawani pero para lamang ayusin ang suweldo ng mga empleyado, gawin ang mga proseso para sa pagbili ng mga kailangan para sa CoVid-19 response, at pagresponde sa emergencies.
“Sa mga may babayaran na ang deadline ay sa 28 Pebrero, ‘wag po kayong mag-alala. Hihilingin po natin sa Sanggunian na magpasa ng ordinansa ng extension ng pagbabayad hanggang 5 Marso 2021 nang walang penalty at surcharge,” ani Mayor Tiangco.
Nang unang inianunsyo na may mga kawani ng pamahalaang lungsod na nagpositibo sa CoVid-19, ipina-isolate agad at ipina-swab test ang kanilang close contacts.
Sumailalim sa swab test ang lahat ng mga empleyado ng city hall, kahit hindi sila close contact at nagsasagawa rin ng general cleaning at disinfection tuwing 3:00 pm – 5:oo pm.
“May mga empleyado ng city hall na hindi naman close contact ngunit nag-positive. Ibig sabihin, may mga tao sa komunidad na positibo ngunit hindi na-detect dahil wala silang sintomas. Kaya nakikiusap po kami na maging maingat ang lahat dahil talagang kumakalat ang virus,” paalala ng alkalde.
(ROMMEL SALES)
