HATAW! D'yaryo ng Bayan hatawtabloid.com
KASUSULAT lang namin dito sa Hataw na naging biktima si Dingdong Avanzado ng basag kotse sa San Francisco, USA kamakailan na wala na talagang pinipiling lugar ngayon dahil uso pala talaga ito maski sa ibang bansa.
Nitong Linggo, Hulyo 1 ay biktima ng basag kotse ang aktres na si Patricia Javier sa may Antipolo City na roon niya ipinarada ang kanyang SUV o service utility vehicle at nagulat na lang siya nang tumunog ang alarm nito.
Base sa panayam kay Patricia ng ABS-CBN news, “may nakita akong dalawang lalaki na naka-motor, na akala ko sinilip lang ang sasakyan ko, ‘tapos biglang nag-alarm kasi sensitive ‘yung sasakyan.”
Sabi pa ng aktres ay lumabas siya para patayin ang alarm at laking gulat niya na basag ang salamin ng passenger seat at nadiskubreng nawala na ang Louis Vuitton bag na may lamang wallet, ATM, at credit cards.
Pinanghihinayangan ni Patricia ang kuwintas niyang may diamond na may nakalagay na PJ (Patricia Javier) dahil nabili niya iyon simula nang pasukin niya ang showbiz.
Ang pakiusap ng aktres, “Sana po kapag may nagbenta sa inyo ng PJ na may mga diamond po, kunin niyo po, itawag niyo na lang sa akin, at kukunin ko po sa inyo kung magkano man ho ‘yung ibinenta sa inyo.”
Naka-blotter na ito sa Antipolo Police Station at hinahagilap ang CCTV kung saan naganap ang pangyayari.
FACT SHEET
ni Reggee Bonoan
