Barker itinumba (Dating asset ng pulis)

PATAY ang isang taxi barker na sinasabing dating asset ng pulis at kalaunan ay nasangkot sa pagbebenta ng ilegal na droga, makaraan pagbabarilin ng hindi nakikilalang suspek sa Malabon City kahapon ng madaling araw.

Hindi umabot nang buhay sa Tondo Medical Center ang biktimang  si Gaspar Maglangit, 34, ng 264 Sitio 6, Brgy. Catmon ng nasabing lungsod.

Habang patuloy ang imbestigasyon ng mga awtoridad upang matukoy kung may kinalaman sa ilegal na droga ang insidente.

Batay sa ulat ni PO2 Juluis Mabasa, dakong 12:15 a.m., tumatawag ng taxi ang biktima sa Caltex Gasoline Station sa M. H. Del Pilar St. at Governor Pascual Avenue, Brgy. Tugatog nang lapitan ng suspek at pinagbabaril si Maglangit.

Narinig nina PO1 Wendell Pogoy at PO1 Christopher Medel ng Tactical Motorcycle Reaction Unit (TMRU) na nagpapatrolya sa naturang lugar, ang putok ng baril kaya mabilis silang nagresponde.

Hinabol ng mga pulis ang suspek at inutusang huminto ngunit tinutukan sila ng baril at pagkaraan ay mabilis na tumakas.