Pagkonsumo ng koryente, nilimitahan ng QCPD

BILANG suporta sa deklarasyon ng State of National Energy Emergency, nilimitahan ng Quezon City Police District (QCPD) ang pagkonsumo ng koryente, ayon sa ulat nitong Miyerkoles.

“In response, the QCPD has implemented the Energy Conservation Program (ENERCON), ensuring that critical energy facilities are closely monitored and protected to maintain uninterrupted operations,” batay sa inilabas na pahayag ng QCPD.

Bilang bahagi ng programa, ang paggamit ng mga air-conditioning units (ACUs) at electric water dispenser ay limitado sa mga karaniwang araw mula 8:00 ng umaga hanggang 5:00 ng hapon, kung kailan ang lahat ng ACU ay naka-off sa oras ng tanghalian, katapusan ng linggo, at holiday.

Papalitan ang mga non-inverter ACU ng mga unit na inverter para sa mas matipid na enerhiya.

Ang mga computer, IT equipment, at iba pang mga de-koryenteng device ay gagamitin lamang para sa mga opisyal na function.

Habang ang mga lighting system sa mga gym, hallway, grandstands, streetlights, at iba pang hindi mahahalagang lugar ay naka-off kapag hindi ginagamit.

Hinihikayat din ng QCPD ang paggamit ng solar-powered lighting sa mga perimeter area ng mga estasyon ng pulis, mga kampo, mga patrol car blinker, at iba pang mahahalagang kagamitan.

“These measures reflect the QCPD’s dual commitment to public safety and responsible energy use. They highlight the vital role of law enforcement in protecting both people and essential infrastructure while supporting national initiatives for sustainable energy,” dagdag sa pahayag. (ALMAR DANGUILAN)