HATAW! D'yaryo ng Bayan hatawtabloid.com
Mga Laro sa Biyernes
1 n.h. – VNS vs AEP-Cabstars
3 n.h. – 3B vs Alpha Insurance
5 n.h. – Criss Cross vs Savouge
HANGAD ng Criss Cross na maulit ang panalo habang determinadong makabawi ang Savouge sa muli nilang paghaharap sa Spikers’ Turf Open Conference preliminaries ngayong Biyernes sa FilOil Playtime Centre.
Ito ang ikalawang pagtatagpo ng dalawang koponan sa loob ng anim na araw matapos dominahin ng King Crunchers ang Spin Doctors noong nakaraang Linggo sa pamamagitan ng sweep na tinampukan ng malakas na panalo sa ikatlong set. Magsisimula ang kanilang laban alas-5 ng hapon.
Bagama’t nabigo, nagpakita ng tapang ang Savouge sa unang dalawang set kung saan naging dikit ang laban, lalo na sa Set 2 bago tuluyang nanaig ang composure ng Criss Cross sa extended rally.
Ngunit naging ibang usapan ang ikatlong set nang ipakita ng King Crunchers ang kanilang lakas, klase at pino na laro.
Mahalaga ngayon para sa Savouge ang tamang adjustments, lalo na sa mga sandaling dikitan at puno ng pressure. Hinahanap pa rin ng Spin Doctors ang ganap na chemistry ng koponan, lalo na sa closing stretch ng mga set.
Pinangunahan ni dating Cignal ace Louie Ramirez ang Savouge sa naitalang 16 puntos habang mahusay ang naging ugnayan niya kay Shawie Caritativo. Nag-ambag naman ng siyam na puntos ang middle blocker na si JP Bugaoan upang magbigay ng presensya sa net.
Gayunman, kinapos ang suporta ng iba pang manlalaro.
Limang puntos lamang ang naitala ni Mark Calado matapos makaranas ng ilang mishits, habang sina Giles Torres, Hero Austria, Madzlan Gampong at Louis Gamban ay nagposte ng mababang produksyon.
Samantala, maagang nagpakitang-gilas ang Criss Cross.
Bagama’t nananatiling pangunahing scorer si Jude Garcia, nagbigay rin ng malaking ambag ang rookie na si Alche Gupiteo na lalong nagpapatatag sa frontline ng King Crunchers.
Agad na nagpakitang-gilas ang dating UST beach volleyball standout sa kanyang debut para sa Criss Cross at kinilala pa bilang Player of the Week.
Bukod sa kanyang scoring, malaki rin ang ambag ni Gupiteo sa reception at depensa sa net.
Ang kanyang 14 na puntos laban sa Savouge—na mas mataas pa sa 13 ni Garcia—ay indikasyon ng mas malalakas pang laro sa hinaharap.
“Pareho pa rin ang ginagawa namin sa ensayo at sa laro. Kapag nag-e-enjoy kami sa ginagawa namin, mas nagiging maganda ang performance namin sa court,” ani Garcia.
Nag-ambag naman ng tig-walong puntos sina Noel Kampton at Lloyd Josafat habang may pitong puntos si Paul Colinares.
Dahil dito, marami pang kailangang ayusin ang Spin Doctors—lalo na sa depensa—kung nais nilang makabawi laban sa kampeon ng Invitational Conference.
Samantala, target ng AEP-Cabstars ang panalo kontra winless VNS Griffins sa alas-1 ng hapon upang makuha ang ikatlong panalo sa anim na laro at mapalakas ang tsansa sa semifinals ng torneo na inorganisa ng Sports Vision at suportado ng Alpha Insurance, Arena Plus, Black Mamba at Premier EMS.
Susubukan din ng Alpha Insurance Protectors (3–3) na ulitin ang kanilang three-set win laban sa 3B Event Masters (2–4) sa alas-3 ng hapon upang manatili sa ikatlong puwesto. Ngunit inaasahang lalabas na agresibo ang Event Masters upang manatiling buhay ang kanilang pag-asa sa semifinals. (HNT)
