MVHOA members hiniling sa DHSUD bantayan ilulunsad na eleksiyon

SUMUGOD sa tanggapan ng Department of Human Settlements and Urban Development (DHSUD) ang mga miyembro ng Multinational Village Homeowners Association Inc. (MVHAI) upang hilingin kay Secretary Jose Ramon Aliling na magsagawa ang ahensiya ng isang halalan na sila ang mamumuno at mangunguna upang tuluyan nang makamit ang katahimikam at kapayapaan sa kanilang village.

Tinangka ng grupo na makakuha ng audience kay Aliling ngunit hindi sila napagbigyan bagkus ay pinayohan na magpa-schedule para sa appointment.

Bunsod nito, itinuloy sa isang kilos protesta ang isinagawa ng HOA members sa harap ng tanggapan ng DHSUD upang hikayatin ang ahensiya na magsagawa ng halalan na kanilang susubaybayan.

Ayon kay Julio Templonuevo, tumatayong pinuno ng grupo, dapat manghimasok ang DHSUD sa halalan at manindigan na gamitin ang kanilang kapangyrihan sa pagresolba ng gusot sa kanilang asosasyon.

Ipinagtataka umano ng kanilang grupo, sa kabila ng pagkakaroon nila ng conference sa pagitan ng magkabilang panig at napagkasunduan ang pagdaraos ng isang halalan ay tila naudlot ito sa isang simpleng pagkuwestiyon o apela ng isang tao.

Ayaw ni Templonuevo na bigyan ito ng kulay ngunit nakapagtataka aniya na sa loob lamang ng isang linggo ay nagawang makapaglabas ng mga kautusan ng DHSUD gayong sila ay mayroon nang matagal na sulat na isinumite pero hanggang sa kasalukuyan ay walang sagot.

Tiniyak ni Templonuevo, sa sandaling matuloy ang halalan sa pamumuno ng DHSUD at lumabas na talo ang isa man sa kanilang kandidato sa grupo ay kanila itong tatanggapin dahil sa pagkakaroon ng patas na laban.

Iginiit ni Templonuevo, panahon na upang mapakinggan ang totoong  sigaw at nais ng mayoryang miyembro ng asosasyon at hindi ang kasalukuyang nakaupo na ipinag-utos ng korte na patawan ng perpetual disqualification.

Nagbanta si Templonuevo na kung hindi sila papansinin ng DHSUD ay hindi sila hihinto upang ipaglaban ang tama at ang kanilang karapatan.

Bukod dito, inamin ni Templonuevo na sumulat na sila kay Pangulong Ferdinand “Bongbong” Marcos, Jr.  at hinihintay na lamang ang tugon ng Pangulo. (NIÑO ACLAN)