Angeline itinanggi ilong ipinagawa

MA at PA
ni Rommel Placente

NILINAW ni Angeline Quinto na natural ang kanyang ilong at hindi siya nagpa-rhinoplasty, gaya ng sinasabi ng iba.

Sa interview sa singer-actress ng komedyanteng si Chad Kinis, sinabi niya na ang secret sa perfect niyang ilong sa kamera ay “magic” ng kanyang make-up artists.

Ngunit hindi ibig sabihin nito na walang enhancements si Angeline. 

Aniya, may mga procedure na siya na ginawa sa tulong ng celebrity doctor na si Dra. Vicki Belo.

“Mayroon, nagpa-lipo ako dati. Taong 2013 nagpa-lipo ako ng tiyan kasi kahit pumapayat ako parang naiiwan ‘yung tiyan ko. Ang hirap. Sa lalaki at babae, sinasabi ni Dra. Belo, kapag may tiyan ka, kahit everyday ka mag-gym, mahirap talaga siyang mawala compared dito sa arms diba,” kwento niya.

Bukod sa liposuction, nagpa-breast reduction si Angeline noong 2016 at nagpa-deep set eye surgery din dati. 

Hindi rin nakalimutan ang braces para sa kanyang ngipin, ayon kay Dra. Belo, para mas mapaganda ang kanyang smile.

Ngunit kahit maraming nag-aakala na nagpa-ilong siya, mariin itong itinanggi ni Angeline.

“After niyong liposuction noong 2013, nagpa-breast reduction naman ako noong 2016. ‘Yun ‘yung mga ipinagawa ko. Maraming nagsasabi na nagpagawa ako ng ilong, tinanggap ko na lang. Pero hindi talaga ako nagpagawa ng nose,” paliwanag pa niya.