HATAW! D'yaryo ng Bayan hatawtabloid.com
HARD TALK
ni Pilar Mateo
INI-REQUEST ko na kantahin ng bokalista ng Innervoices ang Please Don’t Ask Me ni John Farnham.
Ang mensahe ng kantang ‘yun ay sa damdaming sinisikil ng isang tao para sa kanyang napupusuan. Hindi masabi-sabi. Ang taas ng mga tonong hinihirit ng kanta kaya raramdamin at nanamnamin mo ang gusto nitong ipahiwatig.
Nakanta na ito ng mga sikat nating singer. At sa Innervoices, iyon ang naisip kong i-request kay Patrick Marcelino.
Naghintay pa ako ng isa pa uling gig para ito mapakinggan. Dahil siyempre inayos ni Atty. Rey Bergadona lider ng banda at nasa keyboard ang babagay na tono para kay Patrick.
The audience was awed at nagtitilian to the max kasabay ng masigabong palakpakan nang banatan na ito ng bokalista.
Ganyan ang Innervoices. Sinisigurong handa sila sa mga kantang inire-request para i-cover nila.
Na nagagawa nila matapos na kantahin ang mga orihinal nilang piyesa.
Kabilang sa mga bago nilang awiting Meant To Be, Galaw, Idlip, at Tubig, Hangin, Apoy, Lupa (T.H.A.L.), Sayaw sa Ilalim ng Buwan, Handa Na Kitang Mahalin at may mga bago uli.
Hindi lang kay Patrick nakatuon ang pansin ng sumusubaybay sa bawat gig nila. Hindi rin matingkala ang tilian at palakpakan kapag pinaiyak na ni Rene Tecson (lead guitar) ang kanyang instrumento. Gayundin kay Alvin Herbon (bass guitar) at Joseph Cruz (second keys) na kumakanta rin at pagpalo sa drums ni Joseph Esparrago.
At 1992 to the present. Apat na bokalista na ang sumalang. Sumasabay sa ikot ng panahon. Kaya naman hindi matawaran ang estilo nila sa pagkanta at paghahatid ng saya.
Ang maganda pa sa grupo, patuloy silang sinasabayan ng mga umalagwa na sa kanilang genre. Buma-back-to-back sa kanila ang Side A, Neocolours, si Radha (mula sa Kulay Band), at ang APO! At marami pang naka-antabay.
Tagumpay at ‘di mananamlay.
Please don’t ask me kung may sikreto ba sila for staying long in the business. Please lang…
