‘Sandok’ ni Imee hindi lumusot kay Atty. Princess Abante

SIPAT
ni Mat Vicencio

KUNG makapanlait itong si Senator Imee Marcos, para bang walang kapintasan. Wagas kung mang-insulto ng kapwa-tao at mukhang ang tingin sa sariling pagkatao ay perpekto.

Walang pakundangan kung rumepeke ang bunganga ni Imee at walang pakialam kung sino ang masasagasaan, basta ang mahalaga ay maupakan ang kanyang mga kalaban.

Kung marunong lang sanang manalamin si Imee, siguradong masisipat na maraming depekto sa kanyang pagmumukha at baka nga siya mismo ay matakot at tumakbong papalayo kung makikita sa salamin ang sariling anyo.

Sa halip kasing ipaliwanag nang maayos ang kanyang botong yes para i-archive ang Articles of Impeachment laban kay Vice President Sara Duterte, walang ginawa si Imee kundi bastusin ang sariling pinsan na si Speaker Martin Romualdez at tawaging Lolong, dambuhalang sanggol at Bondying.

Dahil sa kabastusan, tinawag tuloy na ‘sandok’ si Imee at pinagsabihang hindi dapat makialam at magdikta sa kung anong dapat gawin ng mga mambabatas lalo sa usapin ng liderato sa Kamara.

Sabi pa ni House Spokesperson Atty. Princess Abante… “May mga nakapagsabi rin sa atin na dapat ay huwag tayong makisandok sa hindi naman natin kusina.”

Sa hindi nakakaalam, si Imee ay binansagang ‘sandok’ dahil sa haba ng baba nito at marami ang nagsasabing nagpatapyas sa ibang bansa para maging maayos tingnan ang mukha.

Sabi pa ni Senator Tito Sotto… “It’s a shame. Sana nag-privilege speech na lang siya, hindi sa explanation of vote. Ang sama rin ng timing kasi habang nagsasalita si Imee, may mga pinalabas ‘yung Sergeant-at-Arms na nag-thumbs down mula sa gallery.”

Hay naku Manang Imee, anong nangyayari sa ‘yo? Habang tumatanda, lumalala!