HATAW! D'yaryo ng Bayan hatawtabloid.com
HATAW News Team
HINDI lamang political opponents, kundi kahit sinong registered voter o taxpayer ay maaaring dumulog sa Korte Suprema o sa House of Representatives Electoral Tribunal (HRET) para kuwestiyonin ang kontrobersiyal na pag-upo ni Tingog partylist Rep. Yedda Romualdez sa Kamara bilang ikaapat nang termino.
Ayon kay Election Lawyer Romulo Macalintal mahalagang mabigyanng resolusyon ang pag-upo ni Yedda Romualdez sa ikaapat na nyang termino bilang miyembro ng House of Representatives dahil magiging ‘precedent’ na ito.
“Kung walang kukuwestiyon dito at mapapayagan lang, lalabas na puwedeng magpalit ang mga Congressman sa District representative tapos partylist representative naman,” paliwanag ni Macalintal.
Kontrobersiyal ang pag-upo ni Yedda dahil kahit ika-6 na nominee siya ng Tingog Partylist ay nahirang na umupo sa third seat ng partylist sa Kamara nang sabay-sabay na nag-resign ang kanilang 3rd, 4th at 5th nominee.
Ang Tingog ay nakakuha ng 3 congressional seat sa nakalipas na eleksiyon, uupo bilang congressman ng partido sina Andrew Romualdez, panganay na anak ng mag-asawang Romualdez , Rep. Jude Acidre, at si Yedda.
Bukod dito, ika-apat na termino na ni Yedda sa Kamara na paglabag sa Article VI ng Konstitusyon na malinaw na nagtatakda na 3 consecutive terms lamang dapat maupo ang isang congressman.
Si Yedda ay nakatatlong magkakasunod na termino bilang kongresista, bilang Leyte District Representative noong 2016 hanggang 2019 at Tingog representative mula 2019 hanggang 2022, at 2022 hanggang 2025.
Ipinaliwanag ni Commission on Elections (Comelec) Chairman George Garcia na “grey area” ang probisyon ukol sa 3 consecutive terms, depensa niya, pinayagan ng Comelec ang pag-upo ni Yedda dahil magkaiba naman ang kanyang “constituents” sa kanyang 3 termino.
Ang una ay sa district at ang dalawang termino ay partylist kaya hindi ito masasabing “three consecutive terms” dahil magkaiba ang constituents.
Ipinaliwanag ni Macalintal na ang interpretasyon sa “3 consecutive terms” ay 3 beses na naging miyembro ng Kamara, malinaw umano na pasok dito si Yedda dahil 3 beses itong gumanap bilang miyembro ng House of Representatives at malinaw ang intensiyon ng batas na limitahan ang termino.
Sinabi ni Macalintal na tanging ang Kataas-taasang Hukuman na lamang ang makapipigil sa pag-upo ni Yedda kung magpapalabas ng temporary restraining order (TRO).
Sa tanong kung paano ang magiging hakbang, sinabi ni Macalintal na maaarimg dumulong sa SC at maghain ng petition for certiorari na kukuwestiyon sa desisyon ng Comelec na iprinoklama si Yedda o sa HRET sa pamamagitan ng petition for quo warranto na kukuwestiyonin naman ang kalipikasyon ni Yedda.
Ipinaalala ni Macalintal na may prescriptive period sa paghahain ng reklamo, sa SC ay 30 days mula nang ibaba ng Comelec ang desisyon na nagpoproklama kay Yedda habang 15 days upon assumption of duty sa HRET.
Aminado si Macalintal na kung walang haharang sa nasabing isyu ay ganito na ang magiging sistema sa hinaharap na maaaring magpalit ang mga congressman bilang district at partylist representative para makapanatili sa puwesto at makaiwas sa 3-consecutive term limitation.
