HATAW! D'yaryo ng Bayan hatawtabloid.com
SINAMPAHAN ng kaso ng isang kadeteng freshman ang apat na kadete ng Philippine Military Academy (PMA) dahil sa pangmamaltrato sa loob ng institusyon, pagkokompirma ng isang opisyal nitong Lunes, 7 Hulyo.
Ayon kay PMA spokesperson Lt. Jesse Saludo, ilang beses na pinagsusuntok, ipinahiya sa publiko, at isinailalim sa matinding pisikal na training ang biktimang lalaking fourth class cadet na naging dahilan upang siya ay mawalan ng malay.
Kabilang sa mga suspek ang dalawang fourth class cadet, isang second class cadet (third year), at isang first class cadet (fourth year), na pawang mga squadmate ng biktima.
Ayon kay Saludo, naiinis umano ang mga suspek dahil sa hindi magandang performance ng biktima sa loob ng PMA na siyang dahilan ng pagbaba ng buo nilang grupo.
Ayon sa PMA, naganap ang alegasyong pangmamaltrato mula 9 -9 Setyembre noong 2024 sa barracks ng mga kadete.
Nakasaad sa reklamo ng biktima, malimit siyang mawalan ng malay dahil sa matinding pagod dulot ng mas mabigat na training na ipinagagawa ng kaniyang mga kasama.
Dumating sa puntong kinailangang manatili sa V. Luna Medical Center sa Quezon City ang biktima matapos suntukin ng isa sa mga suspek noong 29 Setyembre 2024.
Kalaunan ay inilipat siya sa PMA Station Hospital sa Fort Del Pilar, sa lungsod ng Baguio at nakalabas lamang nitong 30 Hulyo, matapos makatanggap ng atensiyong medikal at sikolohikal.
Nagsampa ng reklamo ang biktima laban sa mga suspek sa Baguio CPS.
Samantala, inilinaw ni Saludo na ang insidente ay hindi maituturing na hazing ayon sa Anti-Hazing Act.
Kaugnay nito, pinatawan ng kaukulang parusa ang mga suspek sa loob ng PMA batay sa partisipasyon nila sa pangmamaltrato sa biktima.
Kabilang sa mga parusa ang 60 demerits, 210 touring hours, at 210 confinement days para sa squad leader ng kadete, at isang taong suspensiyon para sa dalawa pang suspek na nanakit sa biktima, habang walang natanggap na parusa ang isa.
Tiniyak ni Saludo na ang PMA ay mayroong mahigpit na zero-tolerance sa pang-aabuso at pangmamaltrato.
Gayondin, ipinahayag ni Saludo na inirerespeto ng PMA ang desisyon ng biktima na sampahan ng reklamo sa korte ang kaniyang mga kasamahan.
