HATAW! D'yaryo ng Bayan hatawtabloid.com
ARESTADO na ang pasahero na nanaksak ng 10-beses sa rider ng motor taxi na Move It noong nakaraang buwan, ayon kay P/Col. Randy Glenn Silvio, Deputy District Director for Administration/Officer-in-Charge ng Quezon City Police District (QCPD) nitong Martes.
Magugunitang nag-viral sa social media ang krimen matapos mahagip ng CCTV camera ang walang habas na pananaksak ng pasaherong suspek sa rider noong nakalipas na buwan
Kinilala ni Silvio ang suspek na isang alyas Mr. Bean, naaresto sa Brgy. Pag-ibig sa Nayon nitong Martes ng madaling araw.
Nakatanggap aniya ng impormasyon ang La Loma Police Station 1 na naglalakad sa lugar ang suspek kaya’t agad silang nagpadala ng mga pulis.
Nang makompirma, dinampot ng mga pulis ang suspek at nahulihan ito ng 9mm pistola at kargadong magazine.
Kung maalala, hindi bababa sa sampung saksak ang pinsala ng rider bago tinangay ang kanyang motorsiklo.
Nasa maayos nang kalagayan ng rider sa kabila ng mga saksak sa iba’t ibang bahagi ng katawan.
Inihahanda ang kasong frustrated murder laban sa suspek. (ALMAR DANGUILAN)
